The BEST and BIGGEST BALKAN SEX ACADEMY - Sanja Nikolik, voditel i model

САЊА НИКОЛИЌ ВОДИТЕЛКА И МОДЕЛ
Отсекогаш сум била тркач, никогаш принцеза

Анета Ристеска

Веќе осум години е надвор од модниот свет, но нејзиното насмеано и привлечно лице и понатаму е дел од ТВ-екраните. Некогашната мис и атрактивна водителка Сања Николиќ е урбана девојка, која со своите постапки и талент на многумина им докажа дека не е само убаво, шармантно и фотогенично лице. Освен по своите блескави моменти на модните писти, успешните обиди во водителските и менаџерски води, ангажираноста во многу впечатливи реклами и спотови, таа продолжува пријатно да ја изненадува публиката и со својата дарба за пишување текстови, чии рефрени ги слушаме преку некои наши познати музички имиња.
Спонтаноста, едноставноста и искреноста во комуникацијата се вистинските одлики што Сања ја прават блиска до луѓето околу неа, но и пошироко.

Ладен јогурт за нов ден

Од најголемиот дел млади луѓе, на кои денот многу често им завршува со добра ноќна журка или понекогаш и подоцнежни работни часови, исклучок не е ни младата и сексапилна, поранешна мис Сања Николиќ. Затоа, пак, утрото разбирливо и почнува малку подоцна.
- Да, спијам долго наутро, да не речам до пладне. И ако немам некои посебни обврски, целиот ден го поминувам со најблиските, особено со моите внуци Дамјан и Мила, чии детски досетки навистина знаат да ме насмеат. Би сакала секој ден да ми е така исполнет, но, за жал, не е - вели Сања.
За разлика, пак, од многумина, утрата на Сања не почнуваат со кафе, зашто, како што вели, кафе не пие. Новиот ден за неа почнува со долго туширање кое треба да ја „освести“ за обврските што следат, а потоа задолжително и чаша ладен јогурт. За релаксацијата вели:
- Мислам дека секогаш сум опуштена, а поимот стрес ретко го регистрирам. Многу често играм тенис, одам на концерти и тоа секогаш во добро друштво. Едноставно, ретко сум сама, но и ретко кога сакам да бидам сама. Тогаш најчесто се излежувам, размислувам за она што ми се случува, но и за тоа што сакам да го доживеам, вели Сања.
Меѓу нештата во кои ужива, ја потенцира и дружбата со своите пријатели:
- Моите пријатели ги почитувам и сакам како да ми се семејство. За некого се многу, за некого малку, но јас мислам дека ги имам онолку колку што ми се потребни и среќна сум поради тоа. Денес е навистина тешко да се најдат искрени луѓе околу себе, но јас мислам дека ги имам вистинските, низ насмевка одговара Сања.
- „И жената знае да вози“. Тоа е името на претставата чија премиера беше неодамна во Драмски театар и која беше оригинално изведена од група млади луѓе, во која игра и моја пријателка. Се изненадив колку младите умеат и можат и се надевам дека во иднина ќе биде ставена на репертоар - одговара Сања, запрашана за културните настани во нашиов град.
Нејзина последна прочитана книга е „Царицата на Давид“ од Индија Еџхил, а убави импресии носи и од филмот „Антарктик окован во мраз“, кој во текот на една недела успеала да го изгледа дури и пет пати.

Не сакам накит

Својот стил на облекување Сања го дефинира како „кежуал“ и спортски. Сака да се чувствува пријатно во тоа што го носи и затоа, како што вели, ретко експериментира.
- Најпријатно ми е кога сум облечена во фармерки и во патики. Знам дека не би можела никогаш да облечам нешто премногу тесно на себе, на пример, изработено од кожа. Верувам дека тогаш чувството сигурно е лошо - вели таа и додава дека нема свои омилени модни креатори.
Од модните додатоци, пак, најмногу преферира очила за сонце, но и капчиња во секое време.
- Не сакам премногу да се китам и затоа немам премногу модни додатоци. Едноставно, од секогаш, и како мала, кога си игравме во маало, бев тркач, а никогаш принцеза - одговара сликовито Сања, запрашана за белезите на нејзиниот стил.